Domekan, San Migel eguneko meza nagusian, agurtuko da Joxan Larrañaga parrokoa.
Hamaika urte egin ditu lan horretan Oñatin, eta erretiroa eskatu zuen, gaixotasunagatik. Oñatiko parroko berria Horazio Argarate izango da eta biak egongo dira domekako meza nagusian. Gipuzkoako bikario nagusia ere izango da aldarean domekako mezan, "batia apaiz gehiago ere", Larrañagak esan duenez.
Larrañagak parkinson gaitza du eta Jose Inazio Munilla gotzainari eskatu zion ardurak arintzeko. "Erretiroa hartzean, nora joan aukeratu dezakegu, eta Azkoitira joango naiz, lagun batekin biziko naiz han eta hari lagunduko diot, ahal dudan neurrian, baina ardura barik", dio Larrañagak.
2008ko irailaren 28an etorri zen Larrañaga Oñatira, eta, hamaika urte hauetan ondo hartu dutelako, "herritarrei eskerrak emanaz" agurtuko dela esan du. Meza ostean, luntxa egongo da parrokiako klaustroan, "herritarrekin egoteko".