Aurrean aurkari gogorra izango zutela jakinda irten ziren kantxara oñatiarrak atzo arratsaldean; eta, horrela izan zen. Basauri Aloña Mendi baino gehiago izan zen eta merezimendu osoz irabazi zituzten bizkaitarrek ligako lehenengo bi puntuak.
Lehenengo zatian ondo eutsi zuten
Partidu guztian zehar aurretik izan ziren bizkaitarrak. Hala ere, lehenengo zatian etxekoek markagailuari eustea lortu zuten eta aldageletara berdinketarekin joan ziren 11-11.
Bigarren zatian, baina, indarberrituta irten ziren Basauriko mutilak. Indartsuago ibili ziren erasoan, eta atzealdea zaintzerako orduan, atezainak lan bikaina egin zuen, baloi garrantzitsuak geldituz. 20-23 izan zen azken emaitza.
Aurkaria zoriondu besterik ez
"Korrika egitea falta izan zaigu", azaldu zuen partidu amaieran Jon Irizar Aloña Mendiko jokalariak. "Partidu zaila" izango zela bazekitela adierazi zuen Irizarrek, eta "aurkaria zoriontzea" besterik ez zaiela geratzen gaineratu.
Irizarrek gehitu du "talde polita" sortu dutela, iazkoarekin alderatuta "baja gutxi" izan dutela eta "gazteak indartsu" datozela. Hori horrela, denboraldi polita egiteko gogotsu daude oñatiarrak.