Hainbat urtez Oñatin kontzerturik eskaini gabe egon badira ere, gaur, Parabellum Barakaldoko taldea ikusteko aukera egongo da gaztelekuan, 22:30ean hasita. Aurrez, Lokuria talde oñatiarraren txanda izango da, zeinek aurten taldearen izen bera izango duen lehen diskoa argitaratuko duen.
Oñatira buelta
Josu Korkostegi Parabellum taldeko bateria-jole eta ahotsak honako hau adierazi du: "Urte batzuk pasa dira Oñatin azkenengoz kontzertua eskaini genuenetik. Emanaldietako bat Eskorbutorekin batera eskaini genuen kiroldegian eta bestea plazaren batean izan zen". Hiru hamarkada baino gehiagoko esperientzia duen talde honek, beraz, jarraitzaile oñatiarrekin topo egiteko aukera izango du gaur: "Geldialdi baten ostean, berriz hasi gara kontzertuak eskaintzen, eta gaurko emanaldirako prest eta gogotsu gaude".
Urte gorabeheratsuak
Musika munduan urteetako esperientzia duen taldea da Barakaldokoa, baina gorabeherak ere izan dituzte bidean: "2000. urtean geldialdia hartu genuen, momentuko egoera politikoak baldintzatuta. Ondoren, taldekide baten gaixotasuna eta heriotza gainditu behar izan genituen", aipatu du Korkostegik. Hala ere, azpimarratu du jarraitzaileen animoei esker oholtzara bueltatzea erabaki zutela.
Lokuria talde oñatiarra
Gaur gaueko emanaldia hirukote oñatiar batekin hasiko da, Lokuria taldearekin, hain zuzen. Hauek ere hainbat urtez dihardute musika munduan eta gaur egun, lehen diskoa izango dena prestatzen ari dira eta laster ikusiko du argia. Intentsitate eta abiadura handiko zuzenekoa eskainiko dute.