Ibilbide luzea du argazkigintzan Joseba Urretabizkaia tolosarrak, eta arlo askotan jardun du: argazki agentzia eta laborategia izan zuen, eta diseinuaren eta komunikazio arloan ere lan asko egin du.
Uztailaren 5ean aurkezpena
Orain dela bi urte, paper arlorantz bideratu zuen bere bidea, eta hala sortu zuen Xibarit argitaletxea, euskal kulturarekin lotutako gaiak azaleratzeko asmoarekin. Jentilak bildumarekin herri kiroletako adineko jendearen biografia batzen dituzten zazpi liburu argitaratu dituzte; eta paraleloan, beste bi bilduma dituzte: Origen eta pertsonaia historikoei buruzkoa bestea; azken hori Lope de Agirreri eskainita zabalduko dute.
Uztailaren 5ean aurkeztuko dute, Oñatiko kultura etxeko zine aretoan, 19:00etan; liburua aurkeztu ostean, Agustin Goenaga oñatiarrak zuzendu zuen Jainkoaren hasarre (1983) film laburra eskainiko dute.
Agustin Goenaga oñatiarra–ezkerrean–, Araozko Sandaili ermitan. Argazkia: Joseba Urretabizkaia.
Erronka, argazkietan
Alvaro Bermejo idazleari eta lagunari eskatu ziola testua idazteko dio Urretabizkaiak: "Loperen biografia eta hari buruzko iritziak, esanak eta istorioak batu ditu, eta Joxemi Saizarrek itzuli du euskarara".
Testuaz gainera, 70 argazki jasotzen dituela dio: "Pertsonaia historikoa izanik, irudietan zer erakutsi da zailena; hortaz, horiek sortzea erabaki nuen. Loperen aurpegia oñatiarra izatea nahi nuen, eta, hango ezagun baten bitartez, Rafa Aranbururi proposatu genion, eta baiezkoa eman zigun. Agustin Goenaga argazkilaria eta zinegilea aurkeztu zidaten geroago, eta hark asko lagundu digu proiektuan. Objektiboaren aurrean ere jarri zen Marañon baten azalean".
