Ibilbide laburra baina "gogorra"
Hori da, hain zuzen ere, Oñatiko prologoan parte hartu duten txirrindulari gehienek adierazi dutena. 2 kilometro eta 100 metroko ibilbidea izan da, baina Oñatiko postetxetik hilerrira dagoen aldapa igo behar izan dute eta askok igoera hori "oso gogorra" zela adierazi dute lasterketa amaitu ostean. Horrez gain, helmugara iritsi aurretik hainbat jaitsiera egin behar izan dituzte eta horiek "oso teknikoak" zirela ere aitortu dute batzuek.
Prologoko irabazle Unai Aznarrek ere, ibilbide gogorra eta teknikoa izan dela adierazi du. Hala ere, pozik azaldu da itzuliko lehen etapa irabazi izanagatik eta datozen egunetan liderraren mailota mantentzeko esperantza duela aipatu du.
Ander Blazquez oñatiarra ere pozik azaldu da, Ulma taldeko denbora onena egin izanagatik. Horrez gain, aipatu du, bidea ezagututa ere gogorra egin zaiola, baina era berean, guztia eman duela.
Hainbat eroriko
Lasterketako antolakuntza lanetan aritu den Ruper Arkauz oñatiarrak aipatu duenez, hainbat eroriko izan dira postetxe ondoko biribilgunean, baina ez dira eroriko larriak izan. Horrez gain, hainbat txirrindularik arazoak izan dituzte katearekin. Bestelakoan, Arkauzek aipatu duenez, lasterketa normaltasunez jokatu da.
Beste hiru etapa
Prologo honekin hasi dute Gipuzkoako gazte mailako itzulia eta aurretik beste hiru etapa izango dituzte. Biharkoa Olaberrian hasiko dute, igandean, Andoainen eta astelehenean, Lazkaon amaituko da itzulia.