Gertakizunari dagokionez, anonimotasuna gorde gura duten gazteek sare sozialen bitartez zabaldutako oharrean hauxe diote: "Larunbat gauean Oñatiko gaztetxeko kontzertutik plazarantz gindoazenean, Antixena parketik ateratzear ginela eta argi urdinak ikustean gutariko batek zipaioak zeudela adierazi zuen. Bat batean hamarren bat ertzain, kale-jantzian eta uniformedunak, gainean genituen; gu, ordea, bost ginen. Eskuak altxatu eta azalpenak eskatu genuenean, borra luzagarriak erabiliz jipoitu gintuzten: amorruz kolpez, indarkeriaz eta irainduz hartu gintuzten, 'zipaio le vas a llamar a tu puta madre' esanez".
Testuan dioten moduan, "jipoiaren ondorioz zaurituta amaitu" zuten: "Ubeldu eta kontusio ugarirekin gerri, hanka eta besoetan. Erabilitako bortizkeriaren erakusgarri da ertzainetako batek borra hautsi zuela".
Salaketa legalik ez dutela jarriko diote, "ekar diezazkigukeen ondorio eta errepresioa ekidin nahi ditugulako; arrazoi berdinagatik anonimotasuna mantentzea erabaki dugu". Eta jarraitzen dute: "Unean argi ikusi genuen ertzainak norbaiten zain zeudela, Jare Kuartela eguna izanik eta inolako arazorik gabe eguna pasa ostean. Horretaz gain, zergatik ez gintuzten identifikatu? Gure parean suertatu ginen baina edonor izan zitekeen".
GOIENAk, bestalde, gertaera horren gainean galdetu du Ertzaintzan eta horren berririk ez dutela adierazi dute, "horrelako gertaerarik jasotzen duen aktuaziorik ez" dagoela asteburuko gertaeren artean.
Jare Kuartela herri ekimeneko kideek esan dute ez dutela gertaera horren gaineko irakurketarik egingo.
