Lehen sektorea "estrategikoa" dela esan die Ainhoa Galdos alkategai jeltzaleak Arantzazuko auzo etxean batu diren nekazari eta abeltzainei eta sektore horrendako zein proiektu dituzten azaldu die. Sektore hori indartzeko Lehen sektorea basoberritzea bultzatuko dutela esan die, "banda marroiaren eta bestelako gaitzen eraginak arintzeko; basogintzaren etorkizuna bermatuko dugu, aldaketa klimatikoan duen eragina gutxitzeko, beti ere ekonomia biribila sustatuta".
Era berean, Oñatiko ganadu zaleen "lana erraztuko" dutela ere esan du, "diru laguntza planak eta programak martxan jarrita". "Landa-kontzientzia" berreskuratu gura dutela ere badio alderdi jeltzaleak, "baserritarrak eta kalekoak diren pertsonen arteko elkarbizitza hobetzeko".
Gaineratu du lehen sektorea indartzea ez dela soilik ekonomia eta enplegua sustatzeko modu bat, "gure natur baliabideen etorkizuna bermatzeko modua ere bada".
Galdosek emandako datuaren arabera, herriko biztanleen “%11 landa eremuko auzoetan bizi da.
Ainhoa Galdosen ondoan izan dira Andoni Altuna zerrenda kidea eta Arantza Ariztimuño, Foru Aldundiko Mendietako eta Natura Inguruneko Zuzendari nagusia.
