Domeka goizean egingo dute Arantzazun Gipuzkoako orientazio ligako bosgarren proba. Maila txikiko, ertaineko eta zaileko ibilbide edo proba bana dute antolatuta eta horiek ondo gainditzea izango da parte-hartzaileen lana. Umeek, familiak, gazteek zein helduek hartu ahal dute parte. Dendaren aurrean elkartuko dira 09:15ean eta han alokatuko dituzte txipak.
Mapak banatu eta Sindikako aparkalekuan egongo da irteera puntua. "Minutu edo bi minutuko aldearekin aterako dira parte-hartzaileak. Mapan markatuta dauden triangeluak topatu eta txipak sartu beharko dituzte. Helmugara iritsitakoan ikusiko da bakoitza zein kontrol gunetik pasa den eta eskatutakoa betez gero proba ontzat emango da", dio Asier Osinagak.
Izen ematea
Proba Gipuzkoako Orientazio Taldeak antolatu du eta internet bidez eman daiteke izena eguen gaueraino, 22:00ak arte. Dagoeneko ia 145 lagunek eman dute izena.
