Banatu dituzte bertso-paper lehiaketako sariak

Bertso-paper lehiaketako irabazleak antolatzaileekin eta Onintza Enbetita bertsolariarekin. Argazkia: Iñaki Olalde.

Hamargarren urtez antolatu dute aurten, Gaztelekuak eta Txinparta Bertso Eskolak elkarlanean, bertso-paper lehiaketa, eta gaur, domeka arratsaldean banatu dituzte sariak. Urtero moduan puntako bertsolari baten eskutik jaso dituzte sariak, oraingoan, Onintza Enbeita izan da sari-banaketa ekitaldian.

Zortzi saridun izendatu ditu aurtengo epai-mahaiak, bi kategoriatan banatuta: bost LH sailean eta hiru DBHko eta batxilergoko ikasleen artean. Etxaun Lizarralde izan da gazteen artean irabazlea, eta segidan jaso dute, hurrenez-hurren, Lide Mendarozketak, Irati Mendizabalek, Maider Alberdi  eta Izaro Elgero bikoteak, eta Naroa Morenok sari bana.

Nagusienetan, berriz, Aitor Tatiegik eskuratu du lehenengo saria, eta Bittor Zubiagirre eta Lide Arregi izan dira, bigarrena eta hirugarrena, hurrenez-hurren.

Ekitaldi xumea eta, aldi berean, gozoa izan dela azaldu du Txinparta Bertso Eskolako kide Iñaki Olaldek: "Saridun bakoitzak bere bertsoa kantatu du eta Onintze Enbeitaren eskutik jaso dute guztiek saria. Enbeita bertsotan entzuteko aukera ere izan dugu, haren bertsoekin hasi dugu ekitaldia eta baita bukatu ere. Ondoren, merienda ederra egin dugu".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.