200 metro bizkar eran Espainiako Txapelketan aritzeko marka minimoa lortu zuen otsailean Kepa Aldekoa oñatiarrak –2.12.84–, eta pasa den asteburuan marka hori hobetzea lortu du –2.12.36–. "Denboraldi bikaina egiten ari da. Irailetik hona, zazpi segundo hobetu ditu", adierazi du Josune Odriozola entrenatzaileak.
Gipuzkoako Txapelketan lortu du marka hori hobetzea. Infantila izan arren, maila absolutuko igerilariekin aritu da, eta bihar ere hala ariko da Euskal Herriko Txapelketan, Iruñean. 200 metroko marka minimoa lortu ostean, 100 metroko marka lortzea du helburu, eta horretan saiatuko da bihar –1:01:05–. Gaur egun, 1.02.16 da haren marka. "Bihar ez dakit, baina uda baino lehenago lortuko dudala uste dut", dio. Izan ere, abuztuko lehen astean jokatuko dute Espainiako Txapelketa.
Hamaika oñatiar Iruñean
Biharko txapelketan, Aldekoaz gain, beste hamar igerilari oñatiar ariko dira lehian: infantil mailako bi, junior mailako zazpi eta absolutu mailako bat.