Aurreko astean estreinatu zen Galdegazte saioaren bosgarren denboraldia. Hamar ikastetxetako ikasleek parte hartuko dute denboraldi berrian eta Debagoienean ezagun diren pertsonak elkarrizketatuko dituzte.
Bihar, oñatiarrak izango dira protagonista. Urgaineko ikasle talde batek egingo ditu kazetari lanak eta elkarrizketatua Josu Zubia izango da, Potx pailazoa. Saioa bihar, 21:30ean eta 23:30ean ikusi ahal izango dute ikus-entzuleek.
Elkarrizketa "goxoa"
Hain zuzen ere, Potx pailazoaren atzean ezkutatzen den Josu Zubia gertutik ezagutzeko aukera izan dute Urgaineko ikasleek. "Oso elkarrizketa goxoa iruditu zitzaidan, mimoz prestatutakoa. Elkarrizketa hau lagungarria da jendeak hobeto ezagutu dezan egiten dugun lana. Egia esan, oso pozik irten nintzen Galdegazte saiotik; nire kasuan, ez da ohikoa izaten elkarrizketa batetik horren pozik irtetea", azaldu du Josu Zubiak.