Aurkari gogorra izan dute gaur oñatiarrek etxean. Aloña Mendik Aialaren aurka neurtu ditu indarrak. Lehenengo zatian oñatiarrak nagusitu dira: atsedenaldira 14-10eko abantailarekin joan dira etxekoak.
Bigarren zatian, urduritasunak
Bigarren zatian etxekoen lana markagailuko aldeari eustea izan da. Ondo ibili dira atzean; baina, askotan, prisa larregirekin irten dira kontraerasora eta horrek huts bat baino gehiago ekarri die. Zarauztarrak gora etorri dira eta aurkari gogorrak direla erakutsi dute: markagailuan bi goleko aldea murriztu dute eta azkeneko minutuetan, penalti bitartez, gol bat atzetik jartzeko aukera ere izan dute. Ioritz Agirianoren neskek defentsan egindako lan onari esker; eta, batez ere Josune Puga atezainak egindako lan bikainari esker bi goleko aldeari eutsi eta 25-23 irabaztea lortu dute oñatiarrek.
Beharrezko puntuak
Olatz Kortabarria jokalariak azaldu du defentsan egindako lanean egon dela norgehiagoka irabaztearen gakoa. "Gainera, azkeneko jardunaldietan gol bakarragatik edo bi goleko aldeagatik galdu ditugu norgehiagokak, eta beharrezkoa genuen garaipena lortzea", azaldu du Kortabarriak. Bolada onari eustea izango da Agirianoren taldearen lana hurrengo asteetan. Hurrengo bi norgehiagokak etxetik kanpora jokatuko dituzte; datorren astean, Ereintzaren aurka, Oreretan.
Taldeko kapitain Olatz Kortabarriarendako, gainera, aurtengo denboraldiko azkeneko lehia izan da. "Kanpora noa lanera; beraz, kanpotik jarraituko dut taldearen ibilbidea", azaldu du.