Defentsan indartsu eta kontrarioari aukera gutxi emanaz aritu dira Aranbururen mutilak hasieratik, eta erasoan, berriz, bizkor jokatuz. Hainbat kontraerasorekin, neurketa hasi orduko hartu dute aldea oñatiarrek, eta handituz joan da neurketa osoan zehar.
Lehen zatia 18-6 amaitu da, eta bigarrenean ez dira gauzak asko aldatu. Joseba Otamendi eta Andoni Bernal izan dira partiduko golegile nagusiak, 9 eta 8 golekin, hurrenez hurren.
Aloña Mendik puntu bateko aldea jan dio jardunaldi honetan lehenengo postuetako borrokan Zarautz liderrari, hark berdindu egin baitu Deusto-Loyolaren kantxan. Oñatiarrek Ereintzaren kantxan jokatuko dute datorren astean.
