Bizikidetzak etorkizunean izango dituen erronkez jardun zuen atzo Jonan Fernandezek, Eusko Jaurlaritzako Giza Eskubide, Bizikidetza eta Lankidetzaren idazkari nagusia, Santa Anan, Oñatiko EAJ alderdiak gonbidatuta. "Kontuan hartu behar dugu mundua aldatzen ari dela eta bizikidetzaren ikuspuntutik erronka berriak ditugu", esan eta erronkak zeintzuk diren azaldu zuen.
Zazpi erronka
Hain zuzen ere, 2017-2020rako Bizikidetzaren eta Giza Eskubideen Planean zazpi erronka estrategiko daude: indarkeriaren amaiera antolatua, iragana argitzea, biktimak, memoria, espetxe-politika, hezkuntza eta bizikidetzaren eta giza-eskubideen kultura.
Bizikidetzan iraganak garrantzia handia duela azpimarratu zuen Fernandezek eta giza eskubideak ezinbestekoak direla egoera normalizatzeko. "Etorkizunean pentsatzean, migratzaileen eskubideak ere errespetatu behar ditugu", gaineratu zuen.