Finalera helduz gero mailaz igoko ziren Ander Biain eta Iñigo Perez Erle, eta, finaleko partidua irabaziz gero, txapeldun bihurtu. Eta biak lortu zituen bikote oñatiar horrek. Abenduaren 21ean jokatu zuten finaleko partidua Zumaiako bikotearen kontra; irabazi egin zuten (22-7), eta Gipuzkoako txapeldunen saria eskuratu.
Bigarren mailara
Aloña Mendik berak eskatu zuen finala Oñatin jokatzea, eta hala izan zen; Zubikoa kiroldegiko frontoian jokatu zuten, abenduaren 21ean. "Zumaiako bikoteko kideetako batek min hartu zuen bezperako egunetan eta ordezko batek jokatu zuen finala. Gu ere ondo aritu ginen, eta, azkenean, dezenteko aldearekin amaitu zen partidua. Oso pozik gaude", dio Ander Biainek. Joan den urtean ere jokatu zuten txapelketa hori Biainek eta Erlek, baina ez zuten zorte bera izan. "Laurdenetara heldu bai, baina kanporatuak izan ginen", gogoratzen du Biainek. Aurten, aldiz, partidua irabazi eta Gipuzkoako txapeldunak izateaz gain, mailaz igo dira. "Senior mailan jokatu dugu azken bi urteetan, eta datorrenean, irailean hasiko den denboraldian, bigarren mailan lehiatuko gara", dio Ander Biainek.
Lau t'erdikoa eta herri artekoa
Hemendik eta udara bitartean beste bi hitzordu ditu buruan Biainek. "Udaberrikoan ez dut parte hartuko, baina bai lau t'erdikoan eta herri artekoan", aitortu du. Bitartean, ohiko entrenamendu saioak egiten jarraituko duela aurreratu du: "Astean behin, behintzat, bai; eta, batzuetan, birritan".