Deialdiaren helburua argazkigintzako bi lan aukeratzea da, ARGI 2019 festibalak irauten duen bitartean, Arantzazuko Gandiaga Topagunean binakako erakusketa batean erakusteko. Paisaia eta identitatea da proposatutako gaia, eta adinez nagusi den edozeinek parte hartu dezake; lehiaketako oinarriak eta informazio gehiago Argifestibala.eus atarian.
Aurten, laugarrenez
ARGI, Oñatiko Ilunpetan Argazki Taldeak bi urterik behin antolatzen duen argazkilaritza festibala da, eta argazkigintza garaikidea zabaltzea du helburu; aurtengoa laugarrena izango da, eta apirilaren 12tik maiatzaren 12ra arte egingo dute.
Edizio honetako berritasun nagusi moduan, deialdiaren komisarioak diren Lurdes R. Basolirekin eta Jon Cazenaverekin batera, bi astez erakusketaren kontzeptualizazioa landu ahal izateko, egonaldi artistiko batekin osatzea erabaki dute antolatzaileek. Horrez gain, aukeratutako argazkilariek bi lan-saio izango dituzte Jorge Oteiza Museo Fundazioko zuzendariorde Juan Pablo Huércanosekin eta eta Erika Goyarrola, artearen historialari eta komisario independentearekin. Egoitza artistikoa guztiontzako zabalik izango den egileen hitzaldi batekin borobilduko dute, esperientzia partekatzeko helburuarekin.