Aste honetatik aurrera, Oñatiko saltokietan erosketak burutzen dituzten bezeroek Harraskatu eta Irabazi txarteltxoak eskuratuko dituzte eta saritua suertatuz gero, Oñatiko produktuekin osatutako Gabonetako otarra jasoko dute.
Hainbat otar
Otarrak 3 botila txakoliz (Belaskua, Murgialdai eta Urpaingoa), gaztai batez (Gomiztegi), madalena poltsa batez (Zelai Zabal) eta txolokatez (Zahor) daude osatuta. Gabonetako otar hauek Foruen Enparantza 7 helbideko lokalean egongo dira ikusgai. Gabonetako otarren banaketa abenduaren 21ean eta urtarrilaren 4an egingo da, 15.30etan, Oñatiko Plazan.
Erosketa txartelak
Harraskatu eta Irabazi txarteltxoekin sarituak izan ez diren bezeroek, txarteltxoaren atzealdea beraien datuekin bete eta 200€-ko sei erosketa txartelen zozketan parte hartu ahal izango dute. Honela, aurtengo Gabonetan ere, abenduaren 24an gastatu behar izango diren 200€-ko hiru erosketa txartel eta urtarrilaren 5ean gastatu beharreko beste 200€-ko hiru erosketa txartel zozketatuko dira.
Zozketa
Zozketak abenduaren 21ean eta urtarrilaren 4an egingo dira eta elkartetik sarituekin egunean bertan jarriko dira harremanetan zorionak eman eta saria jasotzeko geratzeko.
