Kirol batzordeko kideek eta kirolaren inguruan lanean dihardutenek egin dute aukeraketa. Kirol sarietan pisu handia izaten duen saria izaten da herritarrek emandakoa. Sari hori jasotzeko aurtengo hiru hautagaiak dira: Erik Martin atleta, Elene Guridi futbol jokalaria eta Ainhoa Redin igerilaria.
Nola eman botoa
Epaimahaiak proposatutako hiru kirolariren artean aukeratu beharko dute herritarrek. Gaur hasi –abenduak 5– eta abenduaren 19ra arte egongo da botatzeko aukera, oñati.eus atarian. Antolatzaileek azaldu dute bozkatzeko sistema kontrolatuta dagoela ordenagailu bakoitzetik boto bakarra eman dadin.
Parte hartuko duten guztien artean bi lagunendako afaria zozkatuko dute.
Hautatuak "pozik" daude
Hautagaiak diren hiru kirolariek "pozik" hartu dute hautagaitza. "Ezustekoa izan da; beste kirol batzuetan, txirrindularitzan, adibidez, oso ondo dabil jendea. Gustura eta pozik hartu dut nire lehenengo denboraldian horrelako aitortza izatea", azaldu du Martinek. Atletismo sailean bigarren denboraldia du Martinek; iaz, lehenengo urtean, "oso denboraldi ona" egin zuen eta horren ondorioa izan zen Oñatiko Corpusetako nazioarteko lasterketan parte hartzeko jaso zuen gonbidapena. 5 mila metroko lasterketan Euskadiko txapelduna izan zen.
Guridik, "harrituta" hartu zuen albistea: "Ez nuen espero. Ohore bat da hautagaitza hau; saria emango didaten edo ez baloratu gabe, oso pozik hartu dut albistea", gaineratu du Guridik. Realeko emakumezkoen bigarren taldean jokatzen du oñatiarrak, irailaz geroztik. Euskadiko selekzioarekin ere ibili izan da entrenatzen, eta iaz Espainiako txapelketako bigarren fasea jokatu zuen Kantabrian.
Redin ere pozik dago hautagaitzarekin: "Bai, pozik hartu dut albistea, ez nuen espero", dio. Txikitatik igerilekuan egindako lanaren fruitua da Redinek hautagaitza honekin jaso duena. Bizkar erara moldatzen da ondoen Redin, eta 2016an, 2017an eta 2018an Espainiako txapelketak jokatu zituen. Euskadiko txapelketetan askotan igo da podiumera oñatiarra.
Kirolari onena eta talde onena
Herritarren sariaz gain, epaimahaiak erabakita beste sari batzuk ere banatuko dituzte abenduaren 21ean. Oñatiko kirolari onenaren saria; talde onenaren saria; entrenatzaile onenaren saria; eta, kirolaren alde egindako lanaren aitortza. Horiez gain, aipamen bereziak ere banatu ditzakete. Saritu guztien izenak egunean bertan jakingo dira, sari banaketa ekitaldian.
