Oñatiko EH Bilduk antolatu dituen tertulia sortaren barruan, euskararen ingurukoa egin zuten atzo Zigor Etxeburuak (Gipuzkoako Foru Aldundiko Euskarako zuzendari ohia) eta Irati Iciarrek (UEUko langilea eta Geu Gasteiz euskara elkarteko presidentea). Hiru gai nagusi nabarmendu zituzten: instituzioak eta herri mugimenduak, Euskaraldia eta euskara batua eta euskalkiak.
Etxeburuak hasi zuen tertulia, herri mugimenduan euskarako militante izatetik instituziora nola pasa zen azalduz eta batean eta bestean izandako esperientziak kontatuaz: "herrigintzan ikasitakoa Aldundira eraman genuen. Uste dut trakzio lanak egin genituela Aldundian enpresei euskara eskatzeko. Aldundian itzultzaileak jartzea agintaldiaren marketako bat izan zela uste dut eta hor Larraitz Ugartek lan handia egin zuen".
Irati Iciarrek kontatu zuen Oñatitik Gasteizera bizitzera joan zenean konturatu zela bera euskalduna zela, "han ia inork" ez zuelako egiten eta "desberdina" zelako bera. "Gogoan dut, era berean, nola ikusten genuen Gipuzkoako Aldundian euskaraz egitea erabaki zutela eta hori instituzio batean egitea posible zela", gaineratu zuen. Euskaraldiarekin bizilagun askorekin sorpresa atsegina hartu duela ere aipatu zuen Iciarrek.