Txapelketako batzordearen ideia izan zen, eta udalari egin zion proposamena. Honek begi onez ikusi zuen eta, egun gutxiren buruan, taldea txapelketan sartu dute, Larraña izenarekin.
Zentroko egoiliarra den Zakariyaou kamerundarrak taldeko kideen izenean egin du berba, eta azaldu du "oso eskertuta" daudela jokatzeko aukera izateagatik. "Futbolean jokatzeko aukera izateaz gain, herrian integratzen lagunduko digu honek, eta espero dugu lagun berriak egitea", adierazi du.
Oraindik zehazteke duten arren, 22 jokalari inguruk osatuko dute taldea, eta txapelketa hasteko "gogotsu" daudela azpimarratu du Zakariyaouk.
Entrenatzaile, bi oñatiar
Kontuan hartu behar da egoiliarretako batzuek ez dutela inoiz futbolean jokatu, eta, horretan laguntzeko asmotan, Beñat Guerreiro eta Haritz Azurmendi oñatiarrak entrenatzaile izateko boluntario agertu dira. "Hotz Oñatiko kideek egin ziguten proposamena, eta gustura onartu dugu", dio Azurmendik. Astelehenetan eta eguaztenetan egingo dituzte entrenamenduak.
Futboleko arropa behar dute Aloña Mendiko ekipamenduarekin jokatuko dituzte partiduak, baina, Azurmendik jakinarazi duenez, negura begira, futboleko arropa falta dute. "Kirola egiteko jertseak, kamisetak, prakak eta futboleko botak behar dituzte. Beraz, edozein laguntza ongietorria izango da", dio.
Pazientzia
Txapelketako parte-hartzaileei pazientzia eskatu die taldeko arduradunak: “Haiek ere elkar ezagutzen ari dira oraindik, eta agian hasieran haserrealdiren bat edo beste edukiko dituzte, baina errealitate zail batetik datoz, eta ulertu egin behar diegu, gauzak errazten saiatu”.
Harrerarekin, "hunkituta"
Aukera baliatuta, zentroko egoiliarrek herritarrei eskerrak eman nahi izan dizkiete, egindako harreragatik: "Harrera beroa eta benetan hunkigarria izan zen". Era berean, Oñatin oso gustura daudela nabarmendu dute.