'LOPE' filma urriaren 28an aurkeztuko dute Santa Anan

LOPE filma aurkeztuko dute urriaren 28an, Oñatiko Santa Ana Antzokian. Bi emanaldi egongo dira, lehena 17:00etan eta bigarrena 18:30etan. Aurre-estreinua urriaren 27an izango da Gaztetxean, Lope hil zuten eguna gogora ekarriz. 

Sinopsia

Oñatiko herriaren independentzia berreskuratzeko asmoz, 2019ko Udal hauteskundeen atarian Lope Agirre Oñatira itzuliko da eta Marañoien taldea eratuko du. Lopek, 1561ean “El Dorado” espedizioan bizitako abenturak gogora ekarriko dizkigu, baita Espainiako Felipe erregeari idatzi zion eskutitza ere.

Lope Agirre

Lope Agirre konkistatzaile ezagunak 1561ean burutu zuen El Dorado espedizioan munduko pertsona boteretsuena zen Felipe II Espainiako erregeari eskutitza idatzi zion. Benetan gertatu zen pasarte historiko bat oinarri hartuta, LPM taldeak fikziozko pelikula zoro bat egin du. El Dorado espedizioa XVI. mendetik 2019ko Udal Hauteskundeetara ekarri dute. Hori bai, pertsonaia guztiak, Lope izan ezik, asmatutakoak dira.

Prozesua

Gidoia urtarrilean idatzi zuten eta ondoren beste lan batzuekin hasi ziren: antzezleak eta talde teknikoan lana egingo zuen jendea topatu, kokapenak aukeratu, baimenak eskatu, sekuentziak banatu eta desglosatu, story board-a egin, atrezzoa eta jantziak eskuratu, finantziazioa lortu… 

Grabaketak bi astebukaeratan egin dituzte: ekaineko azkenengoan eta uztaileko bigarrenean. Horrez gain, herriko 3 marrazkilarik ilustrazioak egin dituzte eta animazio bezala sartuko dituzte filmean. Guztira ia 70 antzezlek hartu dute parte (guztiak Oñatikoak edo Oñatin bizi direnak), horietatik 16 dialogoarekin eta gainontzekoak figurante lanak egin dituzte. Alor teknikoan 20 pertsona baino gehiagok hartu dute parte: kamerak, drona, soinua, ilustrazioak, argazkia, musika, efektu bereziak, produkzioa, atrezzoa, makillajea…