.jpg)
Etxaluzeko parkearen eraberritze proiektu berria prest dago, eta lanak lizitaziora ateratzeko zain. Lehendik ere eginda zuten parke hori txukuntzeko proiektua, baina aldaketak egon dira eta beste proiektu bat egin dute. Parkearen azpian garajeak daude eta ura sartu izan da behin baino gehiagotan. Bizilagunak horren kexu azaldu izan dira eta parkeko lanekin batera arazoa konpontzea pentsatu zuten bizilagunek eta Udalak elkarrekin. "Lurzorua ondo inpermeabilizatzeko lanen aurrekontuak, baina, nahiko garestiak direla uste dute bizilagunek eta pentsatu dute aurreko asmoekin aurrera ez egitea", azaldu du Irati Etxeberria zinegotziak.
Oraingo proiektu honetan, zoladura asfalto urtuarekin egingo dute, 1.700 metro koadro guztira. Tamaina ezberdinetako hamahiru eserleku jarriko dituzte, iturri bat eta bost horma txiki. Lorategia ere txukunduko
dute, eta argiteria berria jarri. Sarrera eta irteerak irisgarriak izango dira eta bide berri bat egingo dute Bidaurreta aldera, alde biak elkar komunikatuz.
LKSk egin du proiektu berria eta lanen aurrekontua da 240.000 euro.
