Aizkoran hamar kanaerdiko moztea izan zen aurrena egin beharreko lana. Talde gorritik Azkargortak eta Españak jardun zuten, eta beltzetik, berriz, Lizarraldek eta Borja Fernandez segoviarrak.
Gorriek hasieratik hartu zuten aldea aizkoran, Lizarraldek aitortu zuen urduri ibili zela, eta lana amaitzerako lau minutuko aldea kendu zieten gorriek urdinei –20 minutu egin zituzten, eta urdinek 24 pasatxo–.
Gorriek urdinek baino lau minutu gehiago zuten, beraz, segarako. Segan sail handiena mozten zuena izango zen txapeldun. Beltzak atzetik hasi arren, hirugarren taldekide gisa Errezilgo Iñaki Apalantza zuten, artista segan, eta poliki-poliki aldea murriztu zieten gorriei –Azkargorta eta Arrospide aritu ziren segan; beltzetan, bestea, Lizarralde–. Baina ez zien irabazteko eman. Hiru ordu laurdeneko lanaren ostean, gorriak garaile.
