Haka erraldoia egingo dute eskola kiroleko azken jaian

Eskola kiroleko gaztetxoak txirrindularitza saio batean.

Eskola kiroleko azken jaia egingo dute bihar, zapatua, kiroldegiko kantxa berdean. Urtean zehar egindakoaz disfrutatu eta modu alaian ondo pasatzeko eguna izango da biharkoa gaztetxoendako. 10:00etan hasiko dute ekitaldia. Berezia izango da aurtengoa, Gauargi erromeria taldeko Amaia Txintxurretak gidatuko du. Haka erraldoi batekin hasiko dute saioa: "Gaztetxoak animatu daitezela, ondo pasatuko dute eta bukaera alaia emango diogu ikasturteari", aurreratu du Txintxurretak.

Diputazioaren ekimena

Gipuzkoako Diputazioaren ekimena da maorien haka dantza eskola kirolean egiterena. "Harmailaren aurrean ahots bateratu bat, errespetuan eta gozamenean oinarritutako erritual bat, eskolarteko kirolean dagoen agresibitatearen inguruko kontzientzia pizteko proiektu bat" dela azaldu zuten Diputazioko ordezkariek ekimena aurkeztu zutenean. Eee!ntzun izenarekin egin du bideoa Diputazioak eta hainbat kirolari ezagunek parte hartu dute; gainera, Go!azen-eko protagonistek bideoa egin dute, urratsez urrats haka nola egin behar den erakusten. Youtuben daude ikusgai bideo horiek. Bada, pauso horiek erakutsiko ditu Txintxurretak kiroldegian, eta gura duten gaztetxo guztiek izango dute parte hartzeko aukera.

Sari banaketa

Horren ondoren, sari banaketa ekitaldia hasiko dute. LHko 3. eta 6. maila arteko neska-mutikoek parte hartuko dute ekitaldian. Ikasturtean zehar 412 gaztetxok parte hartu dute eskola kirolean. Aitor Guridik banatuko ditu sariak. "3. eta 4. mailetan ez dugu saririk banatzen, parte hartu dutenen artean dominak banatzen ditugu", azaldu du Egoitz Atxagak, eskola kiroleko koordinatzaileak. 5. eta 6. mailetako gazteen artean, txapelketan zehar irabazleak izan direnak sarituko dituzte; horrez gain, parte hartzaile guztien artean opariak banatuko dituzte.

Emanaldia eta luntxa

Ekitaldia amaitzeko, Gauargi taldeak dantza emanaldia eskainiko du. Abesti ezagunak eskainiko dituzte, gaztetxoek eta gurasoek ondo pasa dezaten. Dantzatzeko eta kantatzeko aukera paregabea izango da. Gainera, kiroldegiko tabernan luntxa egingo dute kirol programaren antolaketan parte hartu duten guraso laguntzaileekin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.