"Iazko sailkapenaren arabera antolatzen da txapelketa", azaldu du Josu Osa entrenatzaileak. Dagoeneneko hainbat partidu jokatu dituzte beste talde batzuek; baina Oñatik bihar hasiko du txapelketa, final-zortzirenetan.
Aldaketak egon daitezke bikoteetan
Ondoko bikoteak osatu ditu Osak, baina azken momentuko aldaketak izan daitezkeela aurreratu du: kadete mailan, Azkarate eta Loiti lehiatuko dira; gazte mailan, Perez eta Gartzia; eta nagusien mailan, Biain eta Escalero. Kanporaketa erara jokatuko da norgehiagoka. Lehiatuko diren jokalariez gain, ordezko jokalariak ere behar izaten dituzte, "lesioaren bat egonez gero...".
Zaila da taldea sortzea
Garai batean, herri artekoa jokatu izan zuten Oñatiko pilotariek, baina, gerora, jokatu barik egon izan dira hainbat urtez. Hutsune horren ondoren, laugarren urtea izango da Oñatik herri artekoan parte hartuko duena: "Txapelketara aurkezte hutsa ez da gutxi; izan ere, zaila izaten da taldea sortzea", azaldu du Osak. Horren adierazle da Oñati izango dela txapelketan parte hartuko duen bailarako talde bakarra. Datorren astean jokatuko dute etxean.