Bi urtean behin egin ohi duten moduan, datorren zapaturako, martxoaren 17an, Kantua Kalean ekintza prestatu du Ganbara Txiki Abesbatzak. Aurtengoan, historiako zibilizazio desberdinez jantziko dituzte herriko kaleak. Goizean emango diote hasiera egunari. 12:00etan, 120 ume inguruk kaleak girotuko dituzte, musika eta koreografia desberdinekin. Arratsaldean, 17:00etan, egingo da lehenengo emanaldia gaztelekuan. Bigarrena, 18:30ean egingo da. Arratsaldeko emanaldietan, Imanol Urbieta zena ere omenduko dute, haren abesti ezagunenak entzuteko aukera eskainiko baitute. Sarrerak salgai daude, Txokolateixan, 5 eurotan.
'Arkeologoak' ipuin musikatua
Musikal honek, antzinako zibilizazioetan barrenako bidaia bat proposatzen du. Mesopotamia, Egipto, Grezia... Hori guztia musikaz osaturik eta antzezturik agertuko dute Ganbara Txikiko eta Ikastetxeak Kantariko umeek.
Bereziki umeei zuzendutako ikuskizuna bada ere, edozein adinetako lagunek gozatzeko moduko antzerki musikatua eskainiko dute herriko txiki eta gaztetxoek.
