Deboraldi bikaina egiten ari dira Aloña Mendiko kadete mailako neskak. Orain arte bi ligaxkatan hartu dute parte, eta bietan jaun eta jabe izan dira, nagusitasun handiarekin.
Lehen ligaxka Gipuzkoako taldeekin osatuta zegoen, eta bertan jokatutako neurketa guztiak irabazi egin zituzten. Bederatzitik partidutik, bederatzi garaipen, hain zuzen ere.
Emaitza horiei esker Gipuzkoako Txapelketa jokatzeko txartela poltsikoratu zuten. Bertan probintziako sei talderik onenek elkarren aurka jokatzen dute. Lehiaketa berri horretan, aurreko maila onari jarraipena eman diote, eta atzoko partiduari esker lehen postua geratzea lortu dute. Zarauzko Aiala izan zuten Zubikoan aurkari, eta txantxikuarrak garaile izan ziren, sei goleko aldearekin, 29-23.
Euskal ligara igotzeko borrokan
Gipuzkoako txapeldun izan ostean, Euskal Liga jokatzeko igoera fasera sailkatu dira. "Orain Gipuzkoako lehenengo biak eta Arabako eta Bizkaiko bi txapeldunak klasifikatu gara Euskal Ligako fasetara. Hau da, izango da asteburu bat ostiral, zapatu eta domeka, non hiru partidu jokatuko ditugun Oñatin, eta lehenengo biak Euskal Ligara igoko dira.
