Inoiz baino lehenago iritsi dira aurten Olentzero eta Mari Domingi

Eguerdirako Oñatiko plaza jendez lepo zegoen Olentzero eta Mari Domingi ikusteko. Aurten, inoiz baino lehenago jaitsi dira menditik; 12:30ean iritsi dira plazara, Jose de Azpiazu musika eskolako musikariekin, Haitzondo kuadrillako kideekin eta Algaraz elkartekoekin. Udaletxe aurrealdean egin dute geldialdia, eta han herriko neska-mutikoek Olentzerorengana joateko aukera izan dute. Asko izan dira gutuna eskura eman diotenak. Denek, Olentzeroren eta Mari Domingiren besarkadak eta patxoak jaso dituzte.