Musikegunak egitasmoaren baitako azken kontzertuaz gozatzeko aukera izango da domekan, Santa Ana antzokian; 19:00etarako finkatu dute hitzordua. Soinuaren Bidaia bataiaturiko proiektua taularatuko dute Alberto Urretxok, Adriana Grigorasek, Amaia Zipitriak eta Miren Urbieta-Vegak.
Denborarekin bilakatuz joan den egitasmoa da hori, hartuz joan den dimentsioagatik. Hori bai, Alberto Urretxo musikari arrasatearrak argitu du "bere horretan" dirauela Soinuaren Bidaia-ren izaerak. "Nire bizipenaren isla izaten jarraitzen dute piezek", argitu du.
Gainera, hainbat berrikuntza izango ditu Oñatiko emanaldiak. Batetik, Jesus Urrutia konpositore eskoriatzarrak eurentzat propio sorturiko pieza bat eskainiko dute; Urretxoren alabei eskainia dago hori. Horrez gain, Miren Urbieta-Vega sopranoaren parte hartzea eta Gabriel Loidi konpositoreak proiekturako egokituriko pieza daude berrikuntzen artean.