Bereziki, Lehen Hezkuntzako ikasleak eta familiak izango dira protagonista eta eragile. Eider Eibar artistak gidatutako tailerrak abiapuntu harturik, pertsonaiak sortu eta haien arteko harremanetan sakondu dute hiru saiotan, egunerokotasunean gertatzen diren gorabeherak aztertuta eta egoera gatazkatsuen ebazpen dialogiko eta baketsuak bilatuta.
Orain, berriz, hausnarketa prozesuan daude eta umeek egoera konkretu batzuekiko egiten dituzten interpretazioak baloratuko dituzte. Hausnarketa horretatik ateratako ondorioetan oinarriturik, aipaturiko lau horma-irudiak sortuko dituzte, behin betikoak izango direnak eta ikastetxeko hormetan jarriko dituztenak.
Azaroko bigarren astean emango zaio bukaera proiektuari. Izan ere, Emakumeen Nazioarteko Egunerako –azaroak 25– prest eduki nahi dituzte horma-irudiak.
