740 korrikalari inguru batu ditu Lasterbidean lasterketak Oñatin

Euskal errepresaliatuen eskubideen aldeko nazio lasterketaren V. edizioa egin da gaur, domeka, Oñatin. Eguraldiak askorik lagundu ez duen arren, jende ugarik hartu du parte, bai patinetako lasterketan, bai distantzia motzeko korrika lasterketan, baita distantzia luzekoan ere.

Antolatzaileak gustura azaldu dira V. edizioak izan duen erantzunarekin. "Eguraldiak ez digu askorik lagundu. Hala ere, jende asko ari da izena ematen. Patinetako lasterkariak ere irten dira. Zalantza genuen halako euri zaparradekin aterako ote ziren, baina ausartak izan dira eta parte hartu dute. Beraz, orokorrean, pozik gaude", adierazi du Irati Goitia antolakuntzako kideak.

Deialdia nazionala izanik, Euskal Herriko txoko guztietatik hurbildu da jendea eta Oñatikoak ere asko izan dira, Goitiaren esanetan. Ikusmin handia piztu du Lasterbidean ekimenak Oñatin, eta lasterkari kopurua handia izateaz gain, herriko kale bazterrak ere jendez beteta egon dira.

Goitiak nabarmendu du lan handia suposatu diela Lasterbidean antolatzeak, baina herritarren laguntzarekin, ondo moldatu direla adierazi du. "Horrenbeste izen-emate egonda, lan handia egin behar izan dugu, baina nazio mailan badago talde bat urtero hau antolatzen ari dena eta herriak ere asko lagundu digu. Beraz, bi laguntza horiei esker ondo moldatu gara", dio.

V. edizioa

Duela bost urte egin zen lehenengoz Lasterbidean, Oiartzunen, eta aurtengoa Oñatin izan da. "Herrialde guztietara joan gara. Aurten, berez, Iparraldean egitea tokatzen zen, baina bertan korrikalari bakoitzaren ziurtagiri medikua eskatzen ziguten, eta hori guretako oztopo bat izan da. Beraz, berriro itzuli gara Gipuzkoara", azaldu du Nekane Ayensa Lasterbidean Nazio Elkartasuneko kideak.

Lasterbideanen helburu nagusia da, Ayensaren esanetan, "euskal preso eta errepresaliatuei eta euren senideei elkartasuna adieraztea". Horrez gain, beste aldarrikapen bat ere egin nahi da, kirolaren bitartez. "Dispertsioarekin amaitu behar da. Inoiz ez du eduki zentzurik, baina gaur egun oraindik eta gutxiago. Beraz, horrekin amaitu arte hemen jarraituko dugu, kirol eremutik", adierazi du Ayensak.

Bestalde, urte osoko aldarrikapena dela gaineratu du Ayensak, gaurko egunarekin amaitzen dena. "Aldarrikapen hori urte guztian zehar egiten dugu eta egia esan, pozik gaude orain arte jendeak izan duen erantzunarekin eta batez ere, kasu honetan, Oñatiko herriarenarekin. Ikaragarria da eman duen erantzuna eta pozik gaude horrekin", bukatu du.

Sailkapenak, distantzia luzeko lasterketan (9 km)

Beterano mailan, emakumezkoetan:

1-Saioa Arkonada

2-Raquel Ullate

3-Nuria Goikoetxea

Gizonezkoetan:

1-Iñaki Arriaran

2-Imanol Molinero

3-Alberto Monasterio

Senior mailan, emakumezkoetan:

1-Saioa Arkonada

2-Nere Arregi

3-Amaia Bernal

Gizonezkoetan:

1-Aitor Mimenza

2-Aritz Kortabarria

3-Mikel Ugarte

Gazte mailan, emakumezkoetan:

1-Ainara Uribarri

2-Nagore Uribarri

3-Ekhiñe Mendi

Gizonezkoetan:

1-Unai Ibarra

2-Jon Goikoetxea

3-Gartxot Mugarza

Patinetan, emakumezkoetan:

1-Ainhoa Guridi

2-Ainhoa Sopelana

Gizonezkoetan:

1-Mikel Ruiz

2-Mikel Ugarte

Merituaren Saria

Azkenik, merituaren saria Urko Peña tolosarrarentzat izan da, gurpildun aulkian egonik, lasterketan parte hartzeagatik. Iaz ere parte hartu zuen Araian eta sari hau jaso zuen.

Erlazionatuak

Lasterbidean lasterketa, argazkitan

Oñati

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.