Fan Hemendik taldeak gonbidatuta, Altsasuko gertaerak nola izan ziren eta "aspalditik" jasaten duten "errepresioaren" adibideak kontatu dituzte, besteak beste, Unai Oterminek eta June Bengoetxeak. "Komunikabideek Altsasun gertatu denaren inguruan ematen duten ikuspegia ez da erreala eta, bide batez, herri osoak jasan duen kriminalizazioa salatzera gatoz. Gure hamaika lagunen askatasun osoa exijitzen dugu; hau berriro gertatu ez dadin premiazkoa ikusten dugu desmilitarizazioaren gaia mahai gainean jartzea", adierazi dio Oterminek GOIENAri, saioa hasi aurretik.
Hitzaldi bira, "muntaia desmuntatzeko"
Bengoetxeak, bestalde, gaineratu du hitzaldi bira batekin hasi zirela urtarril erdialdean. Apiril erdialdera arte gutxienez Euskal Herriko hainbat txoko bisitatuko dituzte: "Desmilitarizazioa Piztuz izena jarri genion. Gure helburuen artean daude komunikabideek zeharo desitxuratu duten errealitatea kontatzea eta mahai gainean jartzea desmilitarizazioaren gaia. Izan ere, Altsasu adibide bat da baina jakin nahi dugu beste herrietako errealitatea zein den". Oñatiko Fan Hemendik taldearekin harremana estutzeko aukera ere eman du gaurko saioak: "Oñati ere bada leku interesgarria ideiak partekatzeko eta egoerak ezagutzeko".