Itxialdia egingo dute bihar gauean presoen alde

Kalera Kalera ekimenean parte hartzeko gonbidapena egin dute bultzatzaileek

Duela 40 urte sortutako 'Kalera kalera' abestiaren mezu bera duen ekimena jarri dute martxan preso eta iheslari ohiek eta Oñatin ere ekintza bat baino gehiago egingo dituzte asteburu honetan, adibidez: itxialdia, herri bazkaria, hitzaldiak eta musika kontzertuak.

"Azken bost urte hauetan presoen egoera ez da batere aldatu eta garbi ikusten dugu herri mugimendu bidez bakarrik lor daitekeela hobetzea. Horregatik, herritarrek astinduko duten bide baten hasiera indartsua izango da ekimen hau". Horrelaxe azaldu du Jesus Mari Goitia Manueltxok Euskal Herriko preso eta iheslari ohiek antolatu duten Kalera Kalera ekimena.

Urtarrilaren 8ra arte Usurbilen etengabe egongo dira herritarrak presoen egoera salatzen eta talde bat ere egongo da eragile eta erakundeekin gai horri buruz berba egiteko. Usurbiletik baina, herri askotara egin du salto ekimenak eta Oñatin ere antolatu dituzte ekintzak ekimen horren bueltan.

Itxialdia

Bihar, egubakoitza, elkarretaratzea egingo dute Foruen plazan 19:30ean eta segidan triki bertso poteoa. "Kalera Kalera dioten edalontzi handiak baditugu eta barruan, piztutako kandelak sartuko ditugu. Herritarren artean banatuko ditugu. Eta gauean itxialdia egingo dugu udaletxean. Gura duen edonor etorri ahal da, denak daude gonbidatuta, beraz, oraindik ez dakigu zenbat lagunek pasako duten gaua han", azaldu du Manueltxok.
Zapatuan, Aiert Larrarte abokatua eta Etxerat-eko kide Naike Diez etorriko dira kultura etxera, 11:00etan, eta presoen eta iheslarien egoerari buruz berba egingo dute. "Oñatikoen  ere jardungo dute, nola ez. Joseba Arregik 25 urte egingo ditu preso datorren urtean eta Xabier Ugartek eta Xabin Usandizagak 20", dio Manueltxok. 14:00etan bazkari herrikoia egingo dute gaztetxean eta gauean What a Band eta Mery May entzuteko aukera egongo da 22:00etan hasiko den emanaldian. 24 orduko areto-futbol txapelketa urtarrilean izango da.

Gizarteratu

Urtarrilaren 8an, 14an egingo den manifestaziorako deia egingo dute ekimenaren bultzatzaileek. "Bestalde, presoen kolektiboak eztabaida prozesua jarriko du  martxan laster bakegintzari ekarpenak egiteko, eta prozesu hori gizarteratu eta babestu ere egingo dugu", azaldu du oñatiarrak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.