Txapelketako bederatzigarren jardunaldia jokatu ostean sailkapeneko azken aurreko postuan aurkitzen da Aloña Mendi. Aukera polita zen gaur arratsaldekoa garaipena lortzeko eta lehia bizia egon da norgehiagokaren lehen zatian. Ez da ordea golik izan. Ez oñatiarrek ez Elgoibarkoek ez dute nagusitasun argirik izan eta gol aukera garbirik ere ez.
Bigarren zatian etorri dira partiduko bi golak, eta Elgoibarrek egin ditu biak. Hasi eta gutxira aukera polita izan du Aloña Mendiko jokalari Ibai Morenok. Txilenaz egindako jaurtiketa ederra egin du, baina erantzun bikaina eman dio Elgoibarko atezainak. Oñatiarren hurrengo aukera bigarren zatiko hamargarren minutuan iritsi da. Mikel Palaciosek izan du aukera buruz egindako erremate batekin, baina langatik gora joan da baloia.
Elgoibarko jokalariek ere izan dituzte gola egiteko aukera politak, batez ere 67. minutuan. Oñatiko atezain Julen Agirrek eta atzelarien lanak eragotzi egin dituzte gol horiek. Saiatu eta saiatu, ordea, Oñatiko atea zulatzea lortu dute bisitariek. 72. minutuan buruz egin du gola Elgoibarko jokalari batek korner jaurtiketa baten ostean. Hurrengo jokaldian Julen Palaciosek berdinketa lortzeko aukera ederra izan du, baina ez du behar moduan errematatzea lortu.
Amaierarako hamar minutu falta zirenean epaileak bigarren txartel horia atera dio Joseba Irizarri jokalari oñatiarrari eta etxeko taldeak hamar jokalarirekin amaitu du partidua. Hondarreko minutu horietan egin dute bigarren gola Elgoibarkoek. Kontraeraso azkar batean Issbelek erremate indartsua egin eta huts eta bikoa egin du.
Futbol emaitza gehiago
- Zarautz-Mondra 1-0
- Mutriku-Aretxabaleta 1-1
- Mondra-Lagun Onak 2-1
- Aretxabaleta-Soraluze 2-0
- Bergara-Intxurre 4-0
- Mutriku-Bergara 3-0
- Arizmendi-Eibar 6-1
- Mondra-Anaitasuna 1-0