Gotzon Urzelai: "Jokalariek konfiantza handia transmititzen didate"

Zazpi partidutan puntu bakarra eta aldeko golik ez. Hori da Aloña Mendiko lehen taldearen balantzea orain artean. Hala ere, Urzelai lasai dago, konfiantzarekin. Orain arteko balorazioa egin du, eta baikor dago, taldeak egoerari buelta emango diolakoan.

Egoera zailean zaudete orain.
Jakin badakigu horrelako egoerak ere tokatzen direla eta taldea lasai ikusten dut. Egia esan, puntuetan ez da islatzen taldeak egiten duen lana. Entrenamenduetan topera gaude, partiduetan ere geroz eta lehiakorragoak gara eta horrela jarraitzen badugu, emaitzak etorriko dira.

Zerk huts egiten du?
Baliabidea edo erreminta zein zen jakin ezkero, egoera beste bat litzateke. Garbi dago baloia ez denean sartzen, zerbait falta dela, eta bagabiltza aurreko joko hori hobetzeko automatizazio batzuk lantzen, zelai erdiko jokoaren sorkuntzan eta abar. Beraz, pazientzia eduki behar dugu eta lasai egon, urduri egonda ez dira eta gauzak irteten.

Zer moduz ikusten duzu taldea?
Hori da Aloñak daukan onena. Animo aldetik, oso solidoa da taldea, jokalarien konpromisoa eta konstantzia totalak dira eta, batez ere estutasun egoera honetan, niretako balio handia dauka horrek.

Egoera honi buelta emateko gai ikusten duzu taldea?
Zalantzarik gabe, bestela ez nintzateke hemen egongo. Ni naiz hori pentsatu behar duen lehena, eta konfiantza osoa daukat jokalariengan. Pentsatu behar duguna da oraindik partidu asko gelditzen direla jokatzeko, puntu asko daude jokoan. Beraz, lasai egon behar gara. Ni neu ere lasai nago, jokalariek konfiantza handia transmititzen didate eta horrek balio du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.