Ur txorroten proiektua udarako ez egin izana kritikatu dio EAJk Udal Gobernuari

“Uda igaro da eta oñatiarrek, antzuolarrek ez bezala, ezin izan dute ur txorrotez gozatu, Udal Gobernuak ez duelako proiektua martxan jarri". Adierazpen horixe egin du Oñatiko EAJk, prentsa ohar bidez. San Martingo running zirkuitu iraunkorraren inguruan ere ez dutela "aurrera pausorik eman" gaineratu dute jeltzaleek.

Jeltzaleek diote bidalitako prentsa oharrean proiektu biak uda aurretik martxan jartzeko eskaera egin ziotela Udal Gobernuari, "herritarrek udan aisialdi eta kirol aukera berriez gozatzeko aukera izan zezaten" baina biak "geldirik" daudela.

EAJko kideek diote "aurrekontuetan aurkeztutako bi proiektu horiek herritarrek egindako proposamenetatik jasoak" izan zirela. Proiektuek helburua "oñatiarrei kirol eta aisialdirako eremu berriez gozatzeko aukera" ematea dela diote eta ez dutela ulertze zergatik ez diren gauzatu.

Datorren urtean gauza bera gerta ez gertatzeko, jeltzaleek proiektua lantzen eta aukerak aztertzen hasteko laguntza eskaintzen diote Udal Gobernuari. “San Martingo eremuari dagokionez, gure proposamena zen haurrentzako jolastokia ezartzeaz gain, ibiltzeko eta korrika egiteko zirkuitu iraunkorra eraikitzea, noski guneari dagokion babes ekologiko berezia ziurtatuz, espazioari etekin handiagoa ateratzeko eta herritarrei aisialdirako eta kirola egiteko aukera berriak eskaintzeko. Proiektu honek zuhaizti artean korrika egiteko, kirol praktika aire zabalean sustatzeko eta berdeguneaz familian gozatzeko aukerak eskainiko lituzke” azaldu dute. Eta gaineratu: "Jakin badakigu, proiektu honen aurkako zein aldeko iritziak daudela, baina gobernuari dagokio alde guztiekin hitz egitea eta herritar askoren eskaerari erantzunez, aukera ezberdinak aztertzea eta irtenbideak bilatzea".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.