Xabier Oianeder 30 urtez izan da Gipuzkoako Triatloiko Federazioko presidente, eta erreleboa hartzeko erabakia hartu du Iban Perezek: "Oraindik ez da ofiziala, hautagai bakarra naiz, eta oraindik gainontzekoek helegiteak aurkez ditzakete. Bada, bestelakorik ez badago uztailaren 24an egingo da ofizial nire izendapena, baina irailera arte ez dut kargua hartuko", adierazi du Aloña Mendiko Triatloi Taldeko ordezkariak.
Egitekoen artean, Oñatikoak lehenengo kargua hartu gura du, eta gero gauzak egiteko ze aukera dagoen aztertu. Baina, garbi ditu ideia batzuk: "Aipatu moduan federazio txikia gara, eta baliabide aldetik muga handiak ditugu. Baina, hasteko, gurako nuke Gipuzkoan ditugun taldeen artean –37– komunikazio kanalak hobetzea, eta gure arteko hartu-emana estutzea. Horrekin batera, gaur egun lasterketetako antolatzaileek zailtasun eta oztopo handiak izaten dituzte lasterketak antolatzeko, eta ikusi egin behar da federaziotik zer egin dezakegun oztopo horiek txikitzeko. Horrekin batera, gazteak triatloira erakartzen ahalegindu behar gara, egun kadete eta gazte mailan 12 ordezkari baino ez daude, eta hor badugu zer landu. Eta amaitzeko, emakumezkoen parte-hartzea ere sustatu egin beharko genuke federaziotik".
Iban Perez Antxintxiketan eta Abixaran atletismo taldeko kide ere bada, eta baita GOIENAko kolaboratzaile ere.
