Arantzazuko harrobiari buruzko bilera egingo dute astelehenean

Arantzazura bidean dago harrobia

Handitzeak ingurumen eta hirigintza arloetan ze eragin izango lituzkeen azalduko dute. Osoko bilkuren aretoan izango da bilera, 19:00etan.

Aridos Aloña enpresak kudeatzen du Arantzazuko harrobia eta handitzeko baimena eskatu dio Espainiako industria ministerioaren barruan dagoen meatzaritza sailari. Onartuz gero, Kortakogaineraino helduko litzateke, herri lurrak hartuz. Egoera zein den eta handitzeak zer esan gura duen azaltzeko, herritarrei zuzendutako bilera informatiboa egingo dute datorren astelehenean, hilak 20. 19:00etan izango da, udaletxeko osoko bilkuren aretoan. 

"Arantzazuko harrobiaren handitze horrek ingurumen arloan eta hirigintza arloan ze ondorio izango lituzkeen azaltzeko, bi departamendu horietako teknikariak egongo dira bileran, Aitor Gerenabarrena eta Iñaki Landa. Eurek emango dituzte azalpenak", adierazi du Mikel Biain alkateak.

Aholku batzordea

Herriko hirigintza antolamendua lantzeko proiektua jarri du martxan Oñatiko Udalak eta aholku batzordea ere eratu da. Ekainaren 29an egingo du lehen bilera eratu berri den batzorde horrek eta harrobiaren handitzea izango da hizpide izango duten gaietako bat. Asteleheneko bileran emango dituzte gaiari buruzko xehetasunak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.