"Egunero egongo da zerbait. Aurten ere saiatu gara denetarikoak antolatzen, eta alde horretatik ez dago nobedaderik. Osasunaren inguruko hitzaldia, bingo berezia, txokolate jana eta urteroko bazkaria egingo ditugu, adibidez", aurreratu du Pake Lekuko presidenteak, Tomas Igartuak.
Gaur, astelehena, Aloña abesbatzak emanaldia egingo du Santa Anan, 18:00etan, eta hori izango da asteko lehen ekitaldia. Martitzenean, berriz, Juan Jose Sagarzazu mediku oñatiarrak iktusari buruzko hitzaldia egingo du Santa Anan, 17:30ean. Eguazten goizean irteera egingo dute Ugarkalde eta inguruetara eta egueneko bingo berezian opariak egongo dira. Urteko bazkaria domekan izango da, Zubikoa kiroldegian, eta herri bi nagusik omenaldia jasoko dute: Felix Arregi (90 urte) eta Guadalupe Arregi (95 urte) Musika, dantza eta bertsoak ere izango dira han.