'Oteiza. Eskultura Katalogo Arrazoitua' argitalpenaren aurkezpena, zapatuan, Arantzazun

Arantzazu Gaur Fundazioak, Jorge Oteiza Fundazio-Museoarekin elkarlanean, Oteiza. Eskultura Katalogo Arrazoitua argitalpenaren bigarren aurkezpena antolatu du, ekainaren 11n, zapatua, 12.00etan, Arantzazuko Gandiaga Topagunea kultur zentroan.

Bertan izango dira Jorge Oteiza Fundazio-Museoko presidente Rafael Moneo, Jorge Oteiza Fundazio-Museoko zuzendari Gregorio Díaz Ereño eta argitalpenaren egile Txomin Badiola.

Jorge Oteizaren (1908-2003) eskultura-lanaren berrikuspen kritikoa eskaintzen duen argitalpenaren egile Txomin Badiolaren hitzetan, “Katalogo Arrazoituari ekin nionean, hasierako helburua bikoitza zen: alde batetik, obra osoaren bilduma egitea eta, bestetik, Oteiza artistaren konplexutasunarekiko begirunez jokatuko zuen egitura sortzea”. Horretarako obren katalogazioko informazio gordina (izena, katalogo-zenbakia, data, teknika eta materiala, neurriak, obra mota, inskripzioak, jabetza, kokapena eta jatorria) lanok Oteizaren bizipen prozesu biografikoaren, artistikoaren eta esperimentalaren baitan kokatzen dituen material diskurtsiboarekin osatu da. Horrez gain, argitalpenak dituen bi liburukietan Badiolaren saiakerak tartekatu dira Oteizaren obrak beren testuinguru historikoetan kokatzeko, eta beste zenbait artistarekin eta maila kontzeptualeko gaiekin harremanetan jartzeko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.