6.000 kilo pasa jaso dituzte, oinarrizko produktuetan, Hotz Oñatik eta Hemansaloñak Siriako errefuxiatuei bidaltzeko. Hamalau paletetan batu dituzte gauzak, denak ongi sailkatuta. Egun hauetan etorriko da Fundación Seur-eko trailer bat dena jasotzera: Sindikako koltxoiak, Santa Anako ohe artikulatuak eta hamalau palet janari, manta eta higiene produktuak. Bartzelonara eramango dituzte eta handik Atenasera, Asociación Alhambraren bitartez, apirilaren bukaeran aterako den itsasontzi batean.
Bestalde Zarautzeko boluntarioek Hotz Oñatik batu duen zati bat Calaisera eramango dute zuzenean jai egun hauetan: esnea, lekaleak, kafea, mantak etb. eramango dituzte. Hotz Zarautz, Hotz Bergara eta LautadaBero-tik ere laguntza eskaini diete eta kalitatezko arropa sailkatua eman diete Calaisera zuzenean eramateko.
Laguntza ekonomikoa
Dirua batzen ere ari da Hotz Oñati eta kontu korronte zenbaki bat zabaldu du gura duenak bere ekarpen ekonomikoa egin dezan. Euskadiko Kutxan zabaldu du kontua eta hauxe da zenbakia: ES 93 3035 0005 3500 51070869
