Ospitalean segitzen du Oñatin auto batek harrapatutako emakumeak

Zauri arinekin, baina gorputz guztia minduta, eta besteak beste, eskumuturra apurtuta duela ospitaleratuta dago Oñatin auto batek harrapatutako emakumeak. Andoaindarra da eta Azkoagainera etorri zen futbol partidua ikustera, domekan. Zebrabidetik espaloira igotzen zebilela harrapatu zuen gidari oñatiarrak eta ospa egin zuen. Gazte batzuek geldiarazi zuten hura, 200 metro gorago, Zahor parean.

17:50ean gertatu zen harrapaketa. Gidari batek autoaren kontrola galdu, bolante kolpe batzuk eman zituen, eta Eroskiko zebrabidea (Benediktarren elizako zebrabidea) gurutzatzen zebilen 43-44 urteko emakume bat harrapatu zuen. Oñatiko Udaltzainburuak jakinarazitakoaren arabera, ia-ia espaloira igota zegoela kolpatu zuen automobilak emakumea.

Gazteek geldiarazi

Gidariak, geratu eta emakumeari lagundu beharrean, aurrera segitu zuen. 70-80 bat urteko gizona zen, oñatiarra. Baina atzetik beste auto batean zihoazen gazte batzuek guztia ikusi eta 200 bat metro gorago, Zahor parean, autoa geldiarazi egin zuten, eta harik eta udaltzainak bertaratu ziren arte gizona bazter batean izan zuten, geldi. 

Derrigorra geratzea 

Polizia munizipalak halakoetan ohikoak diren tramiteak abiarazi zituen. Besteak beste, atestatua zabaldu eta gizona epaitegira eramango dute, istripu batean laguntza ez ematearren; "istripu arina bada ere, derrigorra da geratu eta laguntzea", esplikatu du Oñatiko udaltzainburuak. Gutxienez, isunak jarriko dizkiote hari.

Emakumea, berriz, ospitalean dago. Zauri arinak ditu, baina gorputz osoa minduta eta kolpatuta eta besteak beste, eskumuturra apurtuta eta hankan kolpe handia hartuta dago. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.