Oiartzun hobea izan da Azkoagainen (0-2)

Jokin Bereziartua Lizarazu 2016ko ots. 7a, 19:17

Aloña Mendik azkenera arte borrokatu du baina ez da posible izan. Iaz Hirugarren Mailan jokatzen zuen Oiartzun hobea izan da orokorrean eta merezita eraman ditu hiru puntuak Azkoagainetik. Emaitza txarra izan den arren, Igor Serrano entrenatzailea "pozik" geratu da bere jokalariek egindako partiduarekin. Amaieran, Aloña Mendi 0-2 Oiartzun. 

Oiartzunek hobeto eta intentsitate handiagoz  ekin dio Aratuste-domekako partiduari, eta horren ondorioz nagusi izan dira zelaian. Lehen zatiko 35. minutuan, Aloñako atezain Julen Agirrek huts egin du oiartzuarren area kanpoko jaurtiketa baten; atsedenaldira 0-1ekoarekin heldu dira. 

Bigarrenean, parekatuago

Bigarren zatian oñatiarrak ondo hasi dira eta bazirudien berdinketa lortzeko gai izango zirela. Hala ere, bigarren zati horretako 15. minutuan, kontraeraso azkar bat gauzatuz, oiartzuarren aurrelariak jaurtiketa gurutzatu baten bidez 0 eta 2koa egin du. Ondorengo minutuetan hainbat aldaketa egin ditu Igor Serrano entrenatzaileak, baina taldea nahi eta ezin aritu da.

Gaurko porrot honekin urtarrilean Aloña Mendik izan duen bolada ona eten da. Hala ere, bolada ona eten izanari garrantzia kendu dio Serranok: "Ez zaio aparteko garrantziarik eman behar, horrelakoa da futbola. Gaurkoa galduta ere, azken zazpi partiduetatik bost irabazi ditugu". Merezitako garaipena oiartzuarrek lortutakoa.

UDAren berdinketa 

Bestalde, Hirugarren Mailako Debagoieneko ordezkariak bina berdindu zuen atzo, zapatua, Zallaren aurka. Etxetik kanpo puntuak lortzea poztekoa bada ere, atzokoan Gorka Valleren mutilek zapore gazi-gozoa izango zuten, gutxienez. Izan ere, 0-2 jarri ziren aurretik markagailuan eta Zallak azken txanpan berdintzea lortu zuen. Aretxabaletak jaitsiera postuetan jarraitzen du, 22 punturekin. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak