Itsasoaren alderdi gazi-gozoak emakumeen begietatik

'Itsasoaren emazteak' ikuskizuna Oinkari dantza taldeak eta Hika Teatroak egin du.

Antzerkia, dantza eta musika bateratzen ditu Oinkari dantza taldeak eta Hika Teatroak bihar, egubakoitza, Santa Ana antzokian 22:30ean egingo duten Itsasoaren emazteak ikuskizunak. Publiko zabalarentzako  gomendagarria da eta sarrerak hamar eurotan eskura daitezke leihatilan eta on line ere bai, bibe-me atarian.

Kostaldeko herri txiki batean kokatuta dago eta bizkaieraz dago kontatuta. Agurtzane Intxaurragak eta Miren Gojenolak antzeztutako bi saregileak dira protagonistak. Euren bizipenak eta sentipenak kontatzen dituzte  itsasoaren alderdi gaziak eta gozoak batuta. Itsasontzi bateko patroiaren emaztea da Intxaurragak antzeztutakoa, eta senarra itsasoan galdu zuen, berriz, Gojenolaren pertsonaiak.

Aktoreen hitzak hamazortzi dantzari gazteren dantzekin josita daude. Hori horrela, antzeztutako bi pertsonaien iragana irudikatzen dute dantzari horietako bik; beste batzuk, berriz, baporean lanean dauden itsasgizonak dantzaren bitartez aurkezten dituzte, eta beste batzuk ostera, adibidez, itsasoko olatuak dira.

Ikuskizun bisuala 

Begietatik sartuta, bihotzeraino heltzen den horietakoa da. 2013an estreinatu zuten eta harrera oso ona izan du kostaldeko eta barruko herrietan. Informazio zabalagoa gaurko Puntua aldizkarian. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.