Iñaki Varona Urbinaren eskutik (Gasteiz, 1967) jasoko dute hitzaldia bertara hurbiltzen direnek. Varona IKA erakundeko euskara irakaslea da eta aspaldiko trenaren xehetasunak ezagutzera emango ditu.
Inaugurazio eta itxiera egunak, Bergarako Mekolalde auzotik Lizarraraino egiten zuen ibilbidea, Oñatiko adarra barne, eta toki bakoitzetik garraiatzen zituen produktuak ezagutu ahal izango dira, besteak beste.
Duela 40 urte egin zuen trenak azken bidaia, 1967an, eta urte haietan gertatutako gerrak, grebak, istripuak eta pertsonaia askoren bizipenak ekarriko ditu gogora hizlariak. Gertaera historiko horiez gain estraperloaren, errekadisten eta apustuen istorioak ere baditu Vasco-Navarro trenak.