Garaipen garrantzitsua eta uste baino samurragoa Izarraitz Tabernak

32-23. Ia hamar punturen aldea aterata, pozik geratu dira Izarraitz Taberna Aloña Mendi eskubaloi taldeko kideak Escolapios taldearen kontra lortutako emaitzarekin. Indarra ematen die horrek hurrengo jardunaldian arerio gogor baina era berean "gustuko" izango duten Tolosari aurre egiteko. Harmailak beteta egon dira, eta ikusleak jakina, pozik ikusitakoarekin, eta pozik emaitzarekin.

Hamar bat puntuko alde horri eutsi egin dio ia partida osoan Oñatiko taldeak. Hala ere, Aitor Aranburu entrenatzaileak aitortu du txantxikuarrek hobera egin dutela partiduak aurrera egin ahala, eta besteak beste, bigarren zatian defentsa sendoago antolatu izana laguntza handia izan dela garaipena erdiesteko.

Horrekin batera, Aranburuk adierazi du uste baino makalxeago aurkitu dituztela Escolapios taldeko mutilak, "gogotsuago" espero zituzten, aurreko lehiaren ondoren.

Eneko Ugarte atezainak ere Oñatiko taldeak defentsan egindako lana goraipatu du, eta azpimarratu du berez hurrengo norgehiagokan lehiakide izango duten Tolosaren kontra jokatzeko bestela ere gogotsu dauden arren, gaurkoa moduko garaipenak are eta indar handiagoa ematen diela.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.