Bihartik aurrera, asteburu eta jaiegunetan, erakusketa berezia izango da Arantzazuko Gandiaga topagunean, 11:00etatik 14:00etara. Irailaren 12an 60 urte bete ziren Arantzazuko basilika berritu zenetik, eta urteurrenarekin batera ospatu zuten Xabier Alvarez de Eulateren omenezko hirugarren margolan lehiaketa ere. Bertan parte hartu zuten artisten 33 lanak izango dira, hain zuzen, erakusketaren protagonista.
Horien artean da Leticia Gaspar plentziarrarena, aurten berrikuntza gisa martxan jarritako arkitektura saria jasotakoa. Arkitekturaz gain, ordea, paisaiak ere pisu handia du margolanetan, hori baitzen aurtengo lehiaketaren gai nagusia.
Artista bakoitzak, gainera, gustukoen duen estiloan eta bere ikuspegitik irudikatu du Arantzazu. Besteak beste, hirugarren saria irabazi zuen Juan Jose Altunak zuri-beltzean, forma geometrikoak eta itzalak erabiliz, eman zion ukitu berezia Arantzazuko paisaiari. Azaroaren 1a izango da erakusketa bisitatzeko azken eguna.
