Olabarrietako lurpeko pasabidearen lanetarako prestatzen, bidegorrikoak hastear

Pabilioia bota dute lurpeko pasabidea egingo duten inguru horretan.

Udaletik adierazi dute datorren astean hasiko direla Ugarkalde eta Olabarrieta arteko bidegorriko lanak; Gabika enpresak egingo ditu, eta urriaren 15erako amaituta egon beharko dira. Olabarrietako lurpeko pasabidea egiteko lanak, berriz, irailean hasiko dira; prestaketetan ari dira egunotan. Lan hauek tarteko bota behar zuten pabilioia bota dute dagoeneko.

Ugarkalde eta Olabarrieta arteko bidegorriaren lanak urriaren 15erako egon beharko dira amaituta; izan ere, epe hori jarri zuen Foru Aldundiak agindutako diru laguntza jaso ahal izateko. Lanotarako, ia 13.000 euroko laguntza hitzeman du Diputazioak.

Ugarkalde eta Olabarrieta auzoaren sarrera artean egingo den bizikleta eta oinezkoentzako bide zatiak 800 bat metroko luzera izango du, eta hiru metroko zabalera. Errepidearen ertzean joango da, eta hartatik babesteko hesiak jarriko dituzte.

Lurpeko pasabidea

Bestetik, Udana mendate hasieran errepide nagusia lurpetik zeharkatuko duen pasabidea egiteko lanetarako prestakizunetan ari dira egunotan. Lanak irailean hasiko dira, eta Egaralur enpresak egingo ditu. Lanok oztopatuko duten bide zatiaren ordezkoa prestatuko dute egunotan.

Bestalde, Olabarrietako auzunerako sarrera egokitzen ere ari dira egunotan beharginak. Besteak beste, semaforoak jarri dituzte auzorako sarrera parean.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.