Gartzia eta De la Iglesia ere saskibaloi-campusean egongo dira

Apirilean Foruen plazan ere jokatu zuten saskibaloian

Saskibaloi-campusa antolatu du Aloña Mendi kirol elkarteko saskibaloi sailak biharko eta etziko. 1999 eta 2007 urte bitartean (biak barne) jaio diren neska-mutikoei zuzendutako campusa da.

Zubikoa kiroldegiko kantxa urdinean izango da eta hainbat saskibaloi jokalari egongo dira umeekin batera jolasten eta umeei kirol hori erakusten eta ezagutarazten. Horietako bi dira Asier de la Iglesia eta Ander Gartzia. "Umeek disfrutatzea izango da helburua eta jolas ezberdinak prestatu ditugu. Esaterako, baloiak, uztaiak eta konoak erabiliko ditugu. Jaurtiketak lantzeko ariketak eta baloia elkarri pasatzekoak egingo dituzu. Partidu txikiak ere bai", adierazi du Gartziak.

Bihar, egubakoitza, 18:30etik 21:30era izango da saskibaloi-campusa eta zapatuan, 10:00etatik 13:00etara. Gaztetxoek oinetako eta arropa erosoa baino ez dute eraman behar. Zubikoako materiala erabiliko dute.

"Oso oroitzapen onak ditut Oñatiko taldean jokatu nuenekoa eta gogoan dut zaletasun handia dagoela, zale asko joaten zirela partiduak ikustera. Ederra da hori. Honelako campusekin gaztetxoen zaletasuna elikatu gura dugu, eurekin ondo pasatuz", dio Ander Gartziak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.