Eltziak ateak irekiko ditu bihar herritarrendako

Bihar Eteo eraikineko ateak zabalduko dituzte, herritarrek Eltzia proiektua ezagutzeko,  herri-mugimenduen arloan dagoen aniztasuna ikusteko asmoz. "Ate ireki normal batzuk planteatu genituen hasieran, baina, azkenean, herrira gehiago gerturatzeko asmoz, herri mugimenduen azoka bat antolatu dugu" azaldu du Bagarako Johana Olabarriak.

Elkarlanean egindako proiektua da; izan ere, Eteo eraikinean errotuko diren talde bakoitzak ekintza bat proposatu du eta horiekin azoka eratu dute biharko. "Guk baliabideak eman ditugu eta eurak, herri mugimenduak, antolatu dira elkarlanean proiektua aurrera eramateko" gaineratu du Olabarriak.

Hori horrela, egitarau finko bat barik, 17:30ean hasita 20:30ak arte herri mugimendu guztien azoka egongo da bertan.

Euren lana plazaratuz

25 talde izango dira guztira Eteon: esaterako, Gurutze Gorriak lehen sorospen erakustaldia emango du, Ilunpetan argazkilari taldeak, Ihauteri taldeak, Lagun lekuk eta ARTasok erakusketa bana jarriko dute, gela batzuetan Oñatiko film laburren rallyko laburrak egongo dira ikusgai, Txantxikik haur eta gurasoendako jolasak antolatuko dituzte eta Oñatiko Musika Taldeak herrian argitaratutako musika ekoizpenak erakutsiko dituzte, besteak beste. Bestalde, herriko artisauek ere, euren produktuekin azoka jarriko dute, bide batez,
Horretaz gainera, Lizargarateko eta bertso eskolako lagunek giroa alaituko dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.